Младите се клучот за зелена иднина

ФЛОРИТ - Гевгелија како еден од основачите на ЛАГ Бојмија активно придонесува во градењето на зелена и одржлива иднина.

Во изминатиот период, преку проектни активности, младите од територијата на ЛАГ Бојмија, разговараа за важни теми како климатските промени, Европскиот зелен договор и значењето на одговорниот однос кон природата.

Преку интерактивен и младински пристап, активноста им овозможи на учесниците подобро да ги разберат современите еколошки предизвици и начинот на нивно надминување.

Целта на активноста беше да се зголеми информираноста и ангажираноста на младите за климатските прашања и еколошката одржливост, преку пристап кој е близок, разбирлив и инспиративен за нив.

За таа цел, беше реализирана посета на руралниот комплекс Селско домаќинство „Атанасови“ во с. Сирково, општина Росоман, во околината на Кавадарци. За време на посетата, младите имаа можност директно да се запознаат со руралниот начин на живот, локалното производство и одржливите практики кои придонесуваат за зачувување на природата и развој на локалните заедници.

Инаку оваа активност е реализирана во рамки на проектот Младите градат зелена иднина од страна на ЛАГ Бојмија кој е подгрант во рамки на ЕУ проектот „Farm to Fork Academy “, спроведуван од Rural Development Network of North Macedonia. Веруваме дека ова претставува само почеток на нови зелени иницијативи кои ќе ги водат младите кон поодржлива иднина.

Овој проект уште еднаш потврди дека младите, кога се информирани, мотивирани и активно вклучени, стануваат вистински двигатели на позитивни промени во општеството. Посебна благодарност до сите училишта и учесници кои беа дел од оваа иницијатива и придонесоа кон нејзиниот успех.